اكثر من 300 طبخة متنوعة من جميع انحاء العالم

نبدأ وخير البداية بسم الله

بوم الا كريم
(بطاطس بالكريمة )

نص كيلو بطاطس - نص كيلو حليب - 2 صفار بيضة - معلقة كبيرة زبدة
فص ثوم مهروس - بصلة مبشورة - نص كوب كريمة لبانى - ملح - فلفل - جبنو مبشورة
الطريقة:
اقشر البطاطس واقطعها حلقات رفيعة اتخن من الشيبس حاجة بسيطة
فى طبق فرن اضع الزبدة كلها فى الصينية وارصص شرائح البطاطس مثل الصورة
ارش على الوش الثوم والبصلة والملح والفلفل
اصب نص كمية الحليب على البطاطس ثم اضع صفار البيض على باقى كمية الحليب
واخلطهم مع بعض ثم اضع عليهم الكريمة اللبانى واخلط تانى كويس
ثم اصبهم على الصينية وارش الوجه كله بالجبنة المبشورة
ادخل الصينية الفرن على الرف اللى تحت علشان تغلى وتستوى
وبالهنا والشفا



صينية الزرة الصفراء

4 وحدات (كيزان) زرة صفراء - طماطماية كبيرة - ملح- فلفل - فلفلة حمراء
جبنة اى نوع (شيدر او جودة الخ)- عيدان خشبية الخاصة بالشوى
اسلق الزرة صحيحة زى ماهى فى ماء وزرة ملح
اقطعها قطع متساوية ثم ارصصها واقفة فى الصينية
اقطع الطماطم شرائح واقطع الجبنة شرائح واقطع الفلفلة الحمراء شرائح
اضع فوق كل قطعه زرة شريحة طماطم وعليها شريحة جبنة وعليها شريحة فلفل
ثم انغز داخل كل قطعة زرة العصاية (الخلة) الخشب
ادخل الصينية الفرن لحد ماتسيح الجبنة
وبالهنا والشفا




اللازانيا



كيلو دقيق - 100 جم زيت - 3 بيضات - 50 جم حليب - زرة ملح
لحمة معصجة بالصلصة - بشاميل خفيف - جبنة مبشورة
الطريقة
اضع على الدقيق الزيت وزرة الملح و2 بيضة فقط واخلطهم بأيدنا كويس ثم اضع
عليهم الحليب وافضل اعجن بأيدى وحتكون العجينة جامدة وانتم بتعجنوا ثم
اضع البيضة اللى باقية عندنا واكمل العجن على الرخامة كويس
ارش الرخامة دقيق وافرد العجينة بالنشابة مع رش دقيق على وشها
وتحتها اثناء الفرد
ثم اقطعها مربعات مثل شكل اللازانيا اللى بتشتريها ونسلقها فى ماء مغلى
وبعد ماتطلعيها من ماء السلق تطلعيها فى طبق فية ماء مثلج ومكعبات ثلج
ابدء فى عمل صينية اللازانيا
اضع فى الصينية طبقة لازانيا وفوقها طبقة عصاج ثم طبقة جبنة ثم طبقة طبقة لازانيا
ثم طبقة عصاج ثم بشاميل يغطى كل الصينية ثم طبقة جبنة وندخلها الفرن
لمدة حوالى ربع ساعة وبالهنا والشفا




مكرونة بالسى فود



مكرونة فيونكات - جمبرى - سبيط - سمك فيلية - كابوريا - جندوفلى -
ثوم - ملح - فلفل- معلقتين زبدة - كمون - ليمون - حليب
الطريقة
(ملحوظة :ممكن تشتريها جاهزة )
اولا طريقة عمل المكرونة
كيلو دقيق - 100 جم زيت - 3 بيضات - 50 جم حليب - زرة ملح
اضع على الدقيق الزيت وزرة الملح و2 بيضة فقط واخلطهم بأيدنا كويس ثم اضع
عليهم الحليب وافضل اعجن بأيدى وحتكون العجينة جامدة وانتم بتعجنوا ثم
اضع البيضة اللى باقية عندنا واكمل العجن على الرخامة كويس
ارش الرخامة دقيق وافرد العجينة بالنشابة مع رش دقيق على وشها
وتحتها اثناء الفرد
اقطع العجينة شرائح بالطول ثم بالعرض حتتكون عندك مستطيلات صغيرة
تاخدى كل مستطيل وتضغطى علية بصوابعك من النص حتتكون عندك
شكل الفيونكة تضعيها فى الماء المغلى تتسلق وتستخدميها
عادى مثل الجاهزة بالظبط
اضع فى المقلاية معلقتين زبدة واشوح فيها الثوم المهروس ثم اضع
الجمبرى - سبيط - سمك فيلية - كابوريا - جندوفلى والملح والكمون
والفلفل واقلب فيهم كويس لمدة 10 دقايق ثم اضع المكرونة
الفيونكة واقلب تقليبتين تلاتة ثم اضع نص كوب حليب او كريمة لبانى
واقلب لحد ماتاخد غلوة او غلوتين
وبالهنا والشفا



ريش ضانى بالبزنجان المتبل


750 جرام ريش ضانى (نقول كيلو مجتش على حتة )
بزنجانة رومى - جبنة مبشورة - بقسماط ناعم - كسبرة خضراء- بصلة - ثوم - حنزبيل -
قرن فلفل حار (اختيارى)- معلقتين كبار زيت
اشوى البزنجانة اما بوضعها على عين البوتجاز لحد ماتطرى وتتشوى
او بوضعها على صاج فى الفرن ثم اقشرها واهرسها بالشوكة
اتبل اللحمة بالملح والفلفل والزعتر وماء البصل فقط
اضع الزيت فى المقلاية وارصص الريش واقلبهم على الوشين لحد مايستووا ويحمروا
اشيل اللحمة من المقلاية واضع مكانها معلقة زيت واضع الثوم المهروس وقرن الفلفل الحار المهروس
والبصل والجنزبيل وافلب ثم اضع البقسماط واقلب اقلب ثم اضع البزنجانة واقلب ثم اضع الملح والفلفل والكمون والزعتر
واقلب اقلب ثم اضع الكسبرة الخضراء المخرطة واقلب لحد ماتلاقية اتجمع على بعض
احضر اى معلقة مدورة ولتكن المخصوصة بتاعة الايس كريم
واخد من الخليط بالمعلقة على هيئة كورة واضع كورة على كل قطعه لحمة واضع جبنة مبشورة فوق كل قطعه
وادخل الصينية الفلرن لحد الجبنة ماتسيح ولما نطلعها من الفرن نضع الصوص على الوش
وبالهنا والشفا
الصوص ( اضع فى مقلاية على النار البصل والثوم والملح والفلفل والزعتر والطماطماية المخرطة وروز مارى
واقلبهم كويس ثم اضع شوية فى شوية ماء عليهم لحد ماتتسبك ومش حيقل الوقت عن من ربع لنص ساعة لحد ماتكون جاهزة





مكس جريل سى فود


جمبرى - سبيط - سمك فيلية - كابوريا - جندوفلى - كفتة جمبرى
ملح - فلفل- كمون - بصل مبشور تماما - طماطماية كبيرة مبشورة -
ليمون - ثوم مهروس
الطريقة
اولا كفتة الجمبرى
نجيب الجمبرى الصغير خالص ونقشرة ونقطعه بالسكينة صغير قوى
ثم نضع علية ملح وفلفل وكمون وليمون وثوم ونتبله كويس
وبعدين نجيب كبشة دقيق نعجن بيها الجمبرى لحد ما يمسك نفسه
نعمله صوابع ونحمرها او بعد مانعملها صوابع نشويها على الشواية
مع البحريات اللى عندنا
نتبل الجمبرى - سبيط - سمك فيلية - كابوريا - جندوفلى بالبصل والكمون والملح والفلفل و
عصير الليمون والطماطم والثوم ونخلطهم بأيدنا كويس وبعدين نرصصهم على الشواية الفحم
لحد مايتشووا
وبالهنا والشفا
ملحوظة: تاللى معندهاش شواية بالفحم ممكن تجيب مقلاية كبيرة وتضع فيها شوية زيت صغيرين
وتشوح كل البحريات فيها وبعدين تولع فحمة وتحطها فى منتصف
البحريات وتغطيها علشان ياخد طعم الشوى




الطماطم الكونكاسية (البيورية )




طماطم - ماء مغلى
الطريقة
اعملى بالسكينة شق فى الطمطماية ( قطع )
اغلى الماء على النار واول مايبقى فى تمام الغليان
ضعى الطماطم المشقوقة فى الماء وعدى 1-2-3-4-5-6-7-8-9-10
وخلالالاص. تروحى شايلة الطماطم من الماء وقشريها يعنى شيلى القشرة الرفيعه
حيكون شكلها زى اللى فى الصورة عليها السهم الاحمر
وبعدين تقطعيها او تخرطيها او تهرسيها (انا بسهلكم الكلمة بس )
زى الصورة اللى عليها السهم الازرق
وتستخدميها .
ملحوظة:
لما انزل اكلات واقول طماطم بيورية يبقى قصدى هى دى تمام؟؟؟؟





شيرى كونكار



3 أنواع فاصوليا (200 ج بيضاء و200 ج حمراء و200 ج سوداء) - 3 بصلات - طماطم بيورية - ثوم - 200 ج عصاج (ربع كيلو) - 2 فلفلة حار- هوت صوص - زيت
الطريقة
نخرط البصل صغير
نضع معلقتين زيت فى مقلاية واشوح فيهم البصل و الثوم لحد ما يدبلوا
ثم اضع الطماطم البيورية ونص معلقة صلصة حارة (هوت صوص )
واقلب تقليبتين لمدة 5 دقايق ثم اضع اللحمة المفرومة واقلب اقلب مع الملح
والفلفل ثم اضع الفاصوليا مع شوية شوية ماء لحد ما كله يستوى
ويغرف فى الطبق وبالهنا والشفا
ملحوظة /
اذا لم تجدى اى نوع من انواع الفاصوليا ممكن تستعيضى عنها
بذرة صفراء.






فراخ مكسيكانو



نص كيلو صدور فراخ - طماطم بيورية - فلفلة حمراء - فلفلة صفراء - فلفلة خضراء
3 بصلات - فصين ثوم - حزمة كسبرة خضراء - هوت صوص - ملح وفلفل
الطريقة
اتبل الفراخ بالملح والفلفل والهوت صوص ثم اقطعها شرائح بالعرض
اضع معلقتين زيت فى مقلاية واشوح فيها الفراخ لحد ماتصفر حوالى 10 دقائق
حتكون نص سوى وبعدين تشيليها من المقلاية
وفى الطاسة مكان الفراخ تزودى بس معلقة زيت ثم نضع البصل المخرط والثوم
لحد ما يدبلوا خالص ثم اضع الطماطم البيورية تقليبة واحدة ثم اضع الصلصة تقليبة
واحدة ثم اضع الفلفل الملون المخرط صغير واقلب تقليبتين ثم اضع الكسيرة الخضراء
( مخرطة بالسكينة) تقليبة واتركهم على النار حوالى 5 دقائق
وادخله الفرن شوية حوالى 10 دقائق وبالهنا والشفا
ملحوظة / ممكن تتعمل باللحمة البتلو .



الفطير المشلتت


500 جرام دقيق - 200 جرام زبدة طرية - 250 جرام ماء - 10 جرام ملح
30 جرام سكر - 10 جرام حليب ( بودرة )
100 جرام فرش كريم
الطريقة
فى العجانة اضع الدقيق و السكر و الحليب البودرة والملح وانزل بالماء شوية شوية والخلاط شغال لحد ماتتكون عجينة
(حوالى 5 دقائق ) ثم اخذ العجينة واضعها فى كيس نايلون تستريح لمدة نصف ساعة
نرش الترابيزة كويس قوى بالدقيق ونفرد العجينة بالنشابة لحد ما تبقى رفيعه خااالص
اجيب الزبدة وبالسكينة اغطى بيها كل العجينة كويس قوى
ثم
ابدء ابرمها (الفها ) زى السويسرول وادهن جنبها بالطول بالسمنة والفها مثل الكرة داير مايدور
وادخل الطرف بتاعها ادخله تحت الكرة
واتركها نص ساعة تستريح شوية وبعدين ادهن وشها كله كويس جدا بالقشطة وزرة ملح
وادخلها الفرن من 1/3 الى 1/2 ساعه
وبالهنا والشفا






شيتوس



عيش لبنانى او مكسيكى او شامى عادى او رقاق طرى
2 طماطماية بيورية - 200 جرام رومى مدخن (ممكن صدور فراخ)
200 جرام جبنة اى نوع رومى او جودة او شيدر - بصلة صغيرة
ملح وفلفل - قرن فلفل حار
الطريقة
ادهن الخبز من برة بأيدى مسحة خفيفة زيت زيتون
اقطع الجبنة مربعات صغيرة
اقطع الرومى او الفراخ مربعات صغيرة (لو استعملتى الفراخ تكون مسلوقة)
اضع معلقتين زيت على النار واشوح فيه البصلة المخرطة
وقرن الفلفل الحار والطماطم البيورية والملح والفلفل
واتركها دقايق لحد ما الطماطم تستوى
اضع الرغبف امامى وادهنه بأيدى زيت زيتون
وارش علية بالمعلقة من الخلطة ورشة مكعبات ديك رومى ورشة
مكعبات جبنة ثم ابرم السندوتش زى سندوتش الشاورما (اللى بنشترية)
وخلى بالك وانتى بتلفيه تبقى تقفلية من الجناب
اضع فى مقلاية زيت خفيف جدا وارصص فية السندوتشات جنب بعض
وادخلها الفرن لحد ماتنشف شوية ولما تطلع اقطعها بالسكينة بالورب
لتعطى شكل شهى عند الاكل والتقديم
وبالهنا والشفا





كشك ألمظ



3 كوب شوربة دجاج(مرقة) - 4 كوب ذبادى - فص ثوم- 4 معالق دقيق
تقلية
الطريقة
نضع الشوربة على انار مع فص ثوم مهروس تغلى كويس قوى على النار
اضع الدقيق على الذبادى واخلطهم كويس قوى بالمضرب السلك اليدوى
ننزل بخليط الذبادى فى الشوربة واحدة واحدة مع التقليب يأيدنا الثانية كويس قوى وبسرعة
علشان ميكلكعش منك وقلبية يادوب دقيقتين وتطفى النار وتصبية
فى سرفيس التقديم وتضعى التقلية على الوش وبالهنا والشفا
التقلية : بصلة كبيرة قطعيها صغير وشوحيها فى الزيت لحد مالونها يبقى ذهبى غامق
وتستخدم .
ملحوظة :اذا كان الكشك تخين ذودى شوية شوربة واذا كان الكشك خفيف ذودى معلقة دقيق
ملحوظة قالها الشيف ان دايما لكل كوب ذبادى معلقة كبيرة دقيق

ملحوظة: احب اقولك حاجة عن طريقتى فى الكشك وبتطلع طعمها جميل جدا
قبل ماتطفى النار ضعى معلقتين كبار من التقلية فى الكشك نفسة وقلبية و بعد ماتطفى النارعلى الكشك
تعصرى نص ليمونة وتقلبيه ثم تغرفى الكشك فى السرفيس




شاورما تركى
كيلو لحمة ( يفضل من عرق الفيلية او من وش الفخدة ) - 150 ج لية ضانى
2بصلة مفرومة - معلقة صغيرة ثوم - بهارات - معلقة متوسطة زعتر -نص فنجان خل -
عيش شامى - ملح - فلفل
الطريقة
نقطع اللية شرائح رفيعه مثل البفتيك
نقطع اللحمة شرائح رفيعة
نضع اللحمة فى صينية وعليها الخل والزعتر والثوم والملح والفلفل ونخلطهم كويس بالمعلقة
ونفردها فى الصينية ونرصص على وشها شرائح اللية على وش اللحمة على
هيئة طبقة وندخلها الفرن لحد ماتستوى واللية تسيح بتاخد حوالى من 7 الى عشر دقايق
ولما بتطلع من الفرن بنشيل باقى اللية المتبقية على الوش (خلاص مش بنستعملها )
نفتح الخبز وارصص الشاوما داخل الرغيف ثم اقفله
نضع فى مقلاية معلقة ذبدة وشوية صغيرين من الصوص ال----------------------------------- من سوى الشاورما
(اللى موجودة فى صينية الشاورما)
نضع الرغيف فى الطاسة علشان الرغيف يحمر ونلفه من الناحيتين لحد مايحمر من الوشين
ونلفة فى ورقة فويل
وبالهنا والشفا
ملحوظة : اذا كنتى عايزة رغيف الشاورما ملفوف زى سندوتش الشاورما اللى بنشترية
يبقى تضعى رغيف الخبز امامك وتضعى علية الشاورما وتلفية عادى
وبعدين تضعية برضه يتحمر من الناحيتين فى المقلاية اللى فيها
الزيت ومعلقة الصوص
لكن لو عيزاه زى ماهو رغيف يبقى تتبعى الطريقة المكتوبة فوق




فتة تركى

نص كيلو لحمة مفرومة خشن - بصل - ملح وفلفل -نص معلقة زعتر - نص كيلو طماطم
2 معلقة صلصة طماطم - نص معلقة بهارات - زبادى - نص كيلو بزنجان رومى (مكبب)
الطريقة
نقطع البزنجانة مكعبات ونحمرها فى الزيت
نضع فى مقلاية 3 معالق زيت ونضع البصلة الناعمة وزرة ملح ونشوحها لحد ماتدبل
ثم نضع البهارات والزعتر ثم اضع اللحمة واقلب اقلب لحد ماتستوى ثم اضع الملح والفلفل
ثم اضع الطماطم وصلصة الطماطم والبزنجانة على اللحمة ونقلب ونغطيها لحد
ماكله يستوى
نضع معلقة زيت فى مقلاية ونحمر فيها الخبز رغيف رغيف لحد ما الخبز كله يحمر
وينشف شوية
اضع على الزبادى ملح وفصين ثوم مهروسين و صنوبر مجروش
واخلطهم كويس بالمعلقة
نضع فى طبق راقة خليط اللحمة
ثم
فوقه رغيف خبز محمر
ثم
راقة خليط اللحمة
ثم
فوقه رغيف خبز محمر
وهكذا طبقات فوق بعض على هيئة تورتة ونضع اخر طبقة خبز ونفرش عليه
طبقة من الزبادى ثم نرش رشة صنوبر
وبالهنا والشفا




الحواوشى

نص كيلو لحمة مفرومة - ربع كيلو بصل - ملح وفلفل - كمون - قرفة
2 قرن فلفل حار - شطة - عيش شامى او مكسيكى او رقاق طرى - زيت زيتون
الطريقة
نضع اللحمة فى طبق ونخرط عليها البصل وسط ثم نتبلها بالملح والفلفل والكمون والقرفة
والفلفل الحامى والشطة ونخلطهم كلهم مع بعض ثم نأخذ قطعه صغيرة ونفردها كويس قوى داخل الرغيف
ونبطط نبطط بأيدنا ونضغط على الرغيف من بره بأيدنا
اذا كنتى حتستعملى رقاق طرى او خبز مكسيكى ممكن تتركيه مفرود زى ماهو
او تثنية نصين مثل الصورة
ضعى ايدك فى زيت زيتون وادهنى الرغبف كويس من برة
ضعى يادوب مسحة صغيرة زيت زيتون فى المقلاية وضعى رغيف الحواوشى
واقلبية على الناحيتين علشان اللحمة تستوى والرغيف يحمر ويقرمش
من بره وبالهنا والشفا
ملحوظة : فيه ناس اتصلوا بالشيف واشتكوا انهم عملوا الحواوشى بس
اللحمة مستوتش وهو لفت نظرهم لضرورة وضع اللحمة داخل الخبز
طبقة خفيفة فقط



كشرى بالعدس الاصفر
نص كيلو عدس اصفر - نص كيلو ارز - 10 بيضات - بصلة كبيرة - بزنجان اسود (مكبب)
فلفل رومى
الطريقة
اخرط البصلة ناعم واشوحها فى الزيت لحد ماتدبل تماما ثم اضع العدس الاصفر
وافضل اقلبه مع البصلة كويس حوالى 5 دقايق ثم اضع الارز على العدس واقلب اقلب لمدة دقيقتين
واضع ملح وكمون واقلبهم كويس ثم اضع الماء لحد مايغطيهم
واغطيهم ولما يشرب الماء نوطى النار واتركهم لحد مايستووا
عادى زى مابنسوى الارز وبالهنا والشفا





نسلق البيض عادى ونقشرة ونتركه يبرد وبعد مايبرد نضع علية شوية كارى او كركم
وكمون واقلبه بأيدى كويس ثم اضع زيت فى المقلاية واحمره
لحد ما ياخد اللون الدهبى ثم اشيله واركنه










البزنجان والفلفل المقلى
نقطع البزنجان الى شرائح واقلية فى الزيت
اشق كل فلفلة شق بالسكينة علشان متفرقعش فى الزيت وتطرطش عليكى ثم اقلية
فى الزيت
وعند التقديم يوضع على الكشرى الاصفر

طريقة تركيب العدس الاصفر
نضع العدس الاصفر فى السيرفيس ثم اضع علية وحدات من الفلفل المقلى
والبيض المسلوق ومتحمر
وبالهنا والشفا







الكشــــــــــــــــــرى

كيلو ارزمستوى عادى - نص كيلو عدس بجبة (اسود) - ربع كيلو حمص الشام
بصلة كبيرة - نص كيلو مكرونة اسباجتى - نص كيلو مكرونة مقصوصة
نص كيلو مكرونة قلم (الريشة) نص كيلو شعيرية
الطريقة
اخرط البصلة ناعم واشوحها فى الزيت لحد ماتدبل تماما ثم اضع العدس الاسود
وافضل اقلبه مع البصلة كويس حوالى 5 دقايق ثم اضع الماء لحد مايغطى العدس
واغطية واتركه يستوى 3/4 سوى ثم اضع علية الارز المستوى واخلطهم ببعض
كويس علشان الارز ياخد من طعم وريحة العدس نضع الماء ونكمل السوى عادى
اسلق المكرونة كل نوع لوحده فى ماء وملح وزيت بالطريقة العادية
اسلق حمص الشام بالطريقة العادية

البصل المحمر3
3بصلات كبار - 2 معلقة دقيق - ملح - زيت
الطريقة
اقطع البصل شرائح ثم ارش عليه ملح وادعكه ادعكه بأيدى كويس علشان ينزل
كل الماء اللى فية ثم ارش علية الدقيق
وقلبى الدقيق بالبصل كويس بأيدك ثم ضعية فى الزيت المقدوح
لحد مايتحمر ويبقى لونه بنى . شيلية وضعية على جنب فى المصفاة
(والطريقة دى هى السر اللى بيخلى البصل بيقرمش وبيبقى جميل وميبقاش طرى منك وشارب زيت




صلصة الطماطم
كيلو طماطم بيورية - معلقتين صلصة طماطم - ملح - فلفل - كمون - ثوم - خل - شطة
الطريقة
نضع معلقتين زيت زيتون فى حلة ثم نضع الثوم المهروس وشوية كمون علشان يتحمر مع الثوم
ثم اضع الخل لحد مايغلى
ثم اضع الطماطم ومعلقتين الصلصة والملح والفلفل والشطة واتركها لحد ماتتسبك

تركيب طبق الكشرى
نضع المكرونة الاسباجتى والمقصوصة والقلم المسلوقين فى قاع السيرفيس
ثم نضع فوقه طبقة الشعيرية
ثم طبقة الارز بالعدس
ثم طبقة الحمص المسلوق
ثم طبقة البصل المحمر
ويقدم وبجانبه طبق الصلصة وطبق الشطة
وبالهنا والشفا





ملحوظة
متعمليش انتى كل المقدار ممكن تاخدى نصه بس لان كانوا كل العاملين بالاستوديو حياكلوه علشان كدة هو عامل كمية كبيرة





الكبيبة الشامى


نص كيلو برغل - نص كيلو لحمة مفرومة ناعمة - ملح وفلفل - بصلة
عصاج ( سمنة - بصلة متوسطة - لحمة مفرومة و ملح وفلفل )
الطريقة
ننقع البرغل فى الماء لحد ما يطرى ثم نصفية كويس قوى من الماء
ثم نضع علية اللحمة والبصلة ونفرمهم تانى مع بعض كويس لحد ماتنعم
ندهن صينية بالسمنة ثم نضع طبقة من عجينة الكبيبة ثم
نفرش طبقة من العصاج فى النصف
ثم ابل ايدى بالماء واخد قطعه قطعه من الكبيبة وافردها فوق طبقة العصاج
واسويها كويس ثم ارش رشة زيت خفيفة على الوش واقطعها بالسكينة سمبوكسات
وممكن اضع وحدات من الصنوبر
وادخلها الفرن لحد ماتستوى وتحمر
وبالهنا والشفا


ملحوظة : مكنش فية صور لانه كان جايب العجينة معموله جاهزة



كريب المانجو

5 بيضات - 100 ج سكر - 25 ج زيت - 300 ج دقيق -
500 ج حليب - 2 ونص ج ملح - 2 ونص ج فانيليا - 150ج كريم باتسير
قطع مانجو - صوص مانجو
الطريقة
نضع البيض والسكر والملح والزيت والفانيليا مع بعض ونخلطهم
كويس بالمضرب السلك اليدوى لحد ما السكر يدوب
ثم نضع الحليب ونضرب بالمضرب السلك بسرعة
ثم اضع الدقيق واقلب اقلب ولو لاحظت ان فية كلاكيع اصفية بالمصفاة
ندهن المقلاية خفيف بالزيت (يادوب امسحه بمنديل )
واملى الكبشة (المغرفة الغويطة) بالخليط وانزل فى المقلاية بس راقة خفيفة جدا
لحد ماتمسك واقلبها على الوش التانى وبعدين اشيلها وهكذا لحد مانخلص الخليك كله
ادعك الكريم باتسير كويس قوى بالمضرب
اضع واحدة امامى ثم اعمل بالقمع بمقدار الكريمة خط بالعرض
ثم ارصص عليه قطع صغيرة من المانجو والف الكريب على هيئة اسطوانة
ثم اقطعه بالسكينة بالورب وازوقه بالمانجو والكريمة
وبالهنا والشفا





كيكة الكريز

200 ج حليب مغلى - 80 ج سكر - 75 ج لبابة عيش ( قلب الصامولى من الداخل)
6 صفار بيض - 120 ج بودرة لوز (لوز مطحون)- 800 جرام كريز مقطع ومنزوع النوى
12 بياض بيض __ 40 ج سكر
الطريقة
اضع بياض البيض فى الخلاط وانزل علية والسكر واحدة واحدة والخلاط شغال لحد مايتكون الميرانج
اغلى الحليب على النار ثم اضع علية لبابة العيش واقلب ثم اضع بودرة اللوز واقلب اقلب ثم اشيله من على النار
اضرب صفار البيض بالمضرب السلك ايدوى كويس قوى لحد ماحتلاقى لونه بيفتح وبيعلى
ثم اضع علية شوية شوية الحليب واقلب اقلب كويس جدا
ثم اضع الميرانج عليهم واقلب بسرعه بسرعه بالمضرب لحد مايتجانس كل الخليط مع بعض
اضع الكريز عليهم واخلطهم
ثم ادهن الفورمة او الصينية ذبدة ثم اضع العجينة وادخلها فرن متوسط الحرارة على درجة 160 لمدة ساعة ولما تطلع اقلبها فى طبق التقديم والمعها بالجيلى بالفرشاة
ثم ازوقها بالكريز او اختيارى وبالهنا والشفا


مانجة جراتان

راقة اسبونج كيك - 150 ج كريم باتسير - 50 ج كريم شانتى - 50 ج مربى مانجة - مانجة مكعبات - جيلى للتلميع
الطريقة
نضرب الكريم باتسير بالمضرب السلك كويس
ثم اضع علية الكريم شانتية واخلطهم ببعض كويس
اضع فى صينية بايركس راقة من الكيكة الاسفنجية بالفانيليا
ثم اضع عليها طبقة من مربى المانجو وافردها كويس
ثم اضع طبقة من المانجو المقطع مكعبات طبقة كويسة لقرب حافة الصينية
اضع خليط الكريمة على وش الصينية كله وافردة كويس
ثم ادخله الفرن واولع الشعله اللى فوق فقط علشان الوش يعمل جراتان يعنى يحمر
مش حياخد كتير يعنى خليكى جانبه لحد ماتطلعية
وبعد مايبرد لمعية بالفرشاه بالجيلى
وبالهنا والشفا

ملحوظة :
لازم يتعمل بكريم شانتى زى الدريم ويب مثلا لكن مش بكريمة لبانى



البيتسا بالتونة

كيلو دقيق - 100 ج زيت زيتون - 400 ج ماء - 2 معلقة خميرة - زرة ملح
للحشو: طماطم - فلفل رومى اخضر واصفر - زيتون اسود - علبة تونة - جبنة موتزاريلا
بصل = ثوم - زيت - ريحان اخضر -
الطريقة
نضع الدقيق وزرة الملح والزيت واخلطهم
اضع الخميرة ومعلقة صغيرة سكر وفنجان صغير ماء دافىء (بياله)
وادوبهم ثم اضع عليهم الدقيق واعجن بالماء حتى تتكون عندى عجينة البيتسا
للحشو: اضع الزيت على النار ومعلقة ثوم مهروس و بصلة متوسطة مخرطة
والفلفل اللونين ومعلقة كبيرة ريحان ونقلب على النار ثم اضع طماطم بيورية
وملح لحد ما كله يتسبك
افرد العجينة بالنشابة واقطعها مقاس الصينية ثم افرد الخليط على العجينة
ثم اضع رشة جبنة موتزاريلا ثم اضع التونة واضع عيدان رفيعه
من الفلفل الرومى اللونين والبصل وقطع صغيرة طماطم
والزيتون ثم رشة الجبنة على وش الصينية وادخلها الفرن لحد
ما الجبنة تسيح حوالى نص ساعة



بيكيد تشيز كيك

50ج بسكوت دايجستيف - 20 ج ذبدة سايحة - 500 ج كريم تشيز او قريش لايت
150ج ذبادى - 4 بيضات - 120 ج سكر - عصير ليمونة - بشر ليمونة - 25 ج نشا(كورن فلور)
الطريقة
نفرم البسكوت ونخلطة بالذبدة ثم نضعه فى القالب ونبططه بأيدنا ونرفع الاجناب كويس عالية
نضع الذبادى والسكر و الكريم تشيز فى الخلاط ونخلطهم كويس ثم نضع البيض واحدة
واحدة وبعد ما السكر يدوب نضع عصير وبشر الليمون حيكون الخليط شكله مرمل مش ناعم
ثم نخلطه شوية بالمعلقة البلاستيك ثم نضع الخليط فى قالب البسكوت ثم نضع القالب
فى حمام مائى بحيث تكون الماء الى نصف القالب فقط وندخله الفرن على درجة
160 لمدة ساعة وبعد خروجها نفتح القالب ونضعها فى طبق التقديم
ونلمعها بالفرشاة بالجيلى ثم نزوقها بالمانجة
وبالهنا والشفا
ملحوظة : لازم تتعمل بالبسكوت الدايجستيف
بنضع فى التشيز كيك دة عصير الليمون لكن لو عملناه بالفراولة او اى فاكهة لانضع الليمون



حمبرى مشوى بالخلطة

جمبرى بقشره - طماطم مبشورة - بصل مبشور - فلفل رومى مبشور - ثوم مهروس
ملح - فلفل - ريحان - زيت - كمون - خل - زعتر - عصير ليمونة - كسبرة
الطريقة
نقلب كل المقادير مع بعض ثم اضع الجمبرى فى الخلطة
واقلبه كويس فى الخلطة
فى مقلاية على النار اضع زيت لحد ما يقدح ثم اضع فية الجمبرى
ونقلبة على الجهتين لحد مايستوى يادوب مش حياخد دقايق
بالهنا والشفا



سلطة روس



بسلة مسلوقة - جزر مسلوق - بطاطس مسلوقة ومقطعه مربعات
مايونيز - ملح - فلفل ابيض - بيض مسلوق
الطريقة
اضع الخضار كله فى طبق ثم اضع علية حوالى من 3 الى 4 معالق مايونيز واخلطهم كويس
ثم اضع رشة ملح وفلفل واضعها فى الطبق واضع علية بيض مسلوق مقطع
وبالهنا والشفا





معلومة مفيدة من الشيف

الريحان


الريحان يوضع مع السلطات والبيتسا ورائحته جميلة ولكنه يقل تواجده بصورة مستمرة لذلك اتبعى الاتى للاحتفاظ به هاتى كمية الريحان اللى انتى عيزاها وخرطيها بالسكينة وبعدين اضربيها فى الخلاط مع نص كوب زيت ثم ضعيها فى الفريزر واسحبى منه وقت الاستعمال وبتبقى ريحته طازة زى ماهى

لاحتفاظ بلون الخضروات زاهية بعد السلق



بعد تقطيع الخضروات لعمل خضار سوتية مثلا او الاحتفاظ بالخضار فى الثلاجة عند وضعه فى الماء المغلى اثناء السلق تكونى مجهزة حلة او طبق فية ماء بارد وياريت لو كان فيه كام مكعب ثلج وبعد ماتشيلى الخضار مباشرة من الماء المغلى تضعيه فى الماء البارد على طول ودى بنسميها عملية التبريد المفاجىء للاحتفاظ بلون الخضار مزهزة







......بعد تقطيع المشوم الفريش واستخدامه فى السلطة يجب عصر
عصير ليمون عليه علشان ميسودش


....الفلفل المجروش
هو الفلفل المكسر وليس المطحون
وطريقة عمله ... نضع الفلفل الحب اللى بيبقى شكله كور صغيرة فى كيس نايلون
وندقه من بره بحاجة جامدة زى هون او شاكوش ونكسرة



جرانيتا الفراولة


150 ج عصير فراولة - 150 ج عسل
مقدار العسل : كيلو ماء - 750 ج سكر - ليمونة (تعصر الليمونة بعد غليان الماء والسكر )
الطريقة
نضع عصير الفراولة والعسل فى طبق غويط واضربهم بالمضرب السلك كويس
اصب الجرانيتا فى صينية بدون حواف(زى بتاعة البيتسا او السويسرول) بس تكون طبقة
رفيعه جدا وندخلها الفريزر لحد ماتجمد حوالى ساعه او ساعه ونص





جرانيتا الليمون
(معنى كلمة جرانيتا يعنى معجون الفاكهة)



150ج ليمون بلدى - 150ج ماء - 300ج عسل
مقدار العسل : كيلو ماء - 750 ج سكر - ليمونة (تعصر الليمونة بعد غليان الماء والسكر )
الطريقة
نضع عصير الليمون وبشر الليمون والعسل فى طبق غويط واضربهم بالمضرب السلك كويس
اصب الجرانيتا فى صينية بدون حواف(زى بتاعة البيتسا او السويسرول) بس تكون طبقة
رفيعه جدا وندخلها الفريزر لحد ماتجمد حوالى ساعه او ساعه ونص







جرانيتا المانجة
150 ج عصير مانجة - 150 ج عسل
مقدار العسل : كيلو ماء - 750 ج سكر - ليمونة (تعصر الليمونة بعد غليان الماء والسكر )
الطريقة
نضع عصير المانجو والعسل فى طبق غويط واضربهم بالمضرب السلك كويس
اصب الجرانيتا فى صينية بدون حواف(زى بتاعة البيتسا او السويسرول) بس تكون طبقة
رفيعه جدا وندخلها الفريزر لحد ماتجمد حوالى ساعه او ساعه ونص




green apple



جرين ابل بالجرانيتا

نكحت الجرانيتا بالمعلقة
نقور التفاح الاخضر كويس ونفضيه خالص ثم نضع التفاحة فى الكآس
ثم نضع الجرانيتا فى التفاحة (يعنى نحشيها) ثم نضع كريم شانتى






الصوص
اللى بيوضع على الحلويات والآيس كريم وكل حاجة

صوص الفراولة

250 ج بيورية فراولة - 2 معلقة كورن فلور - ماء
نذوب الكورن فلور فى شوية ماء ونضع الفراولة على النار اول ماتغلى
نضع الكورن فلور واول مايبتدى الخليط يمسك نطفى

صوص المانجو

250 ج بيورية المانجو - 2 معلقة كورن فلور - ماء
نذوب الكورن فلور فى شوية ماء ونضع الفراولة على النار اول ماتغلى
نضع الكورن فلور واول مايبتدى الخليط يمسك نطفى

صوص التفاح

250 ج بيورية التفاح - 2 معلقة كورن فلور - ماء
نذوب الكورن فلور فى شوية ماء ونضع الفراولة على النار اول ماتغلى
نضع الكورن فلور واول مايبتدى الخليط يمسك نطفى




طريقة عمل الشكل : بعد عمل الصوص نضعه فى قراطيس صغيرة ثم نضع بجانب بعض على طول نقطة من كل لون وبعدين نجيب السكينة الرفيعه ونسحب من منتصف اول نقطة لتحت على طول لحد ماتوصلى لاخر نقطه حتعمل معاكى شكل القلوب دى



يوجورت ميلك تشيك

3 كوب زبادى - 100 ج آيس كريم فانيليا - فريش كريم
الطريقة
نضع الزبادى والآيس كريم فى الخلاط ويضرب لمدة دقيقتين
ويصب فى الكأس ويجمل بالكريمة وبأصابع شيكولاتة فان
او حسب الرغبة (انظرى الصورة)

تشوكلت ميلك شيك


150 ج حليب - 100 ج آيس كريم شيكولاتة - فريش كريم
الطريقة
نضع الحليب والآيس كريم فى الخلاط ويضرب لمدة دقيقتين
ويصب فى الكأس ويجمل بالكريمة وبأصابع شيكولاتة فان





مانجو ميلك شيك
150 ج حليب -150ج مانجو بيورية - فريش كريم - نعناع
الطريقة
نضع الحليب والمانجو فى الخلاط ويضرب لمدة دقيقتين
ويصب فى الكأس ويجمل بالكريمة والمانجو
او حسب الرغبة (انظرى الصورة)
ملحوظة: طريقة عمل بيورية المانجة: تقشر المانجة وتهرس ثم نضعها على النار
لحد بادوب ماتغلى نضع سنة كورن فلور واول ما المانجة تمسك تشيليها وتصفيها وتستخدم






فراولة ميلك شيك
150 ج حليب - 150 ج فراوله بيورية فريش كريم
الطريقة
نضع الحليب والفراولة فى الخلاط ويضرب لمدة دقيقتين
ويصب فى الكأس ويجمل بالكريمة وبأصابع شيكولاتة فان
او حسب الرغبة (انظرى الصورة)
ملحوظة: طريقة عمل بيورية الفراولة: تقشر المانجة وتهرس ثم نضعها على النار
لحد بادوب ماتغلى نضع سنة كورن فلور واول ما المانجة تمسك تشيليها وتصفيها وتستخدم





السلطة البلدى


بصل - طماطم - خيار - جرجير - شبت - بقدونس
ملح - فلفل - كمون - زيت زيتون
الطريقة
نخرط البصل ونضع علية شوية ملح وندعكه بأيدنا كويس ونقطع علية كل المقادير قطع صغيرة
ونفلب كله مع بعضه ثم نتبل السلطة بكل التوابل ونخلط السلطة مع بعض كويس
وبالهنا والشفا




طاجن بحريات مشكل

بطاطس - كابوريا - جمبرى - جندوفلى - سبيط - بصلة مبشورة - طماطم -
فلفل رومى اخضر واحمر - فلفلة حامية - سمك هامور او قاروس او بورى -
نص كيلو حليب
الطريقة
نفتح السمكة من ضهرها ونضعها فى صينية ونضع عليها انصاص فصوص ثوم
نقطع البطاطس شرائح ونرصصها على السمكة
ثم نضع الكابوريا و الجمبرى والجندوفلى والسبيط
والبصل و الفلفل الرومى الاخضر والاحمر والفلفل الحامى
ورشة ملح وفلفل وكمون وكسبرة وكوب زيت ثم فى الاخر نضع
الحليب وندخلها الفرن
وبالهنا والشفا





كمونية السمك

سمكة بورى - ملح- فلفل - كمون - ثوم - ليمون - زيت - ماء
نضع فى الخلاط راس ثوم كاملة وكمون كتيييييير وماء وزيت ونضربهم كويس قوى مع بعض
نفتح السمكة من الجنب وننظفها ونضعها فى الصينية ونضع الحشو عليها
ونعصر عليها ليمونتين ونضع قشر الليمون مع السمكة فى الصينية
مع رشة ملح وندخلها الفرن
وبالهناوالشفا








زر حمام


(بديل الحمام المحشى)
بطاطا طويلة وتخينة - اجنحة فراخ (عدد 2 جناح لكل واحدة بطاطا ) - بصل - ذبدة - ملح - فلفل -
جوزة الطيب - حبهان - بصلة مقطعه - ارز - ورق فويل
الطريقة
نقطع البطاطا بالطول من المنتصف ونقورها من الداخل ونعمل فى كل جنب تجويف صغير
نضع على الارز كل التوابل والبصل ونخلطة كويس
نحشى البطاطا بالارز كويس مكان ماقورناها
نضع جناحين فى التجويفين اللى عملناهم ثم نضع الجزء اللى فوق اللى قطعناه بالسكينة فى الاول
كأنك بتغطى الارز ثم تضعى البطاطا المحشية كل واحدة فى ورقة فويل
وتقفلى عليها كويس قوى قوى قوى
تغلى ماء على النار وتضعى فية ملح وبصل وحبهان ثم تضعى فية البطاطا المغلفة
ةنغطى الحلة لحد ما تستوى ثم نفك الورق الفويل عنها ونضعها فى صينية
وعليها قطعه ذبدة وندخلها الفرن لحد ماتحمر
وبالهنا والشفا
ملحوظة : دى اكله بديله عن الحمام المحشى وبطعم الحمام يعنى احنا بنعمل البطاطا كأنها
حمامة بالظبط وبنديها شكل الحمامة بالظبط





كرنب بالليمون


كرنب مقطع شرائح - شبت - بقدونس - كسبرة - نعناع - طماطم مبشورة
نص كيلو ارز بسمتى - ذبدة - بصل مبشور اجنحة فراخ - عصير 3 ليمونات
نضع الذبدة فى حلة على النار وعليها البصلة المبشورة ونشوحها ثم نضع
اجنحة الفراخ ونقلب نقلب ثم نضع معلقة كمون ونص معلقة فلفل اسود وونص معلقة جوزة الطيب
وشطة وملح وونص معلقة قرفة ونقلب نقلب ثم نضع الطماطم تقليبتين تلاتة
ثم نضع الكرنب ونقلب كله كله من فوق لتحت ثم نضع كبشة بملو ايدك الشبت وكبشة بملو ايدك البقدونس
والنعناع وكبشة بملو ايدك الكسبرة الخضراء ونقلب كويس ثم نضع الارز ونقلب كله مع بعض
ثم نضع الماء لحد ما الخليط يتغطى وبعد ما الماء يغلى
نضع عصير 3 ليمونات ونغطى لحد مايستوى عادى زى الارز
ونغرفه وبالهنا والشفا

ملحوظة:الكرنب طبعا اللى هو الملفوف
طعمه فى منتهى الجمال هو هو نفس فكرة الكرنب المحشى بس بدل ما تفضلى تحشى دة بيستوى وبيديكى نفس طعم الكرنب المحشى واسهل من المحشى ومن باب التغيير





الممـــــبار



نضع الممبار فى الخل لمدة ساعه علشان نتخلص من اى ريحة
وبعدين نغسله وبعدين نحشية
خلطة حشو الممبار
ارز - بصل - شبت - بقدونس - كسبرة خضراء - طماطم فرش - نعناع - شطة
الطريقة
نخرط البصلة والشبت والبقدونس والطماطم والكسبرة
اخلط الخلطة كلها ونحشى بيها الممبار ونسلقه ونحمره فى الزيت





فتة الكوارع



كوارع بتلو - رغيف خبز بلدى - نص كيلو طماطم معصورة - ربع كوب خل - 2 كوب ارز
- 2 كوب شوربة كوارع - 4 فصوص ثوم - ارز ابيض
الطريقة
نسلق الكوارع فى ماء وبصلة وجزرة مقطعه وورق لاورالحد ما تستوى الكوارع




الصلصة بالخل والثوم

نضع فى حلة معلقة زبدة ثم نضع الثوم المهروس لحد مايصفر
ثم نضع معه رشة كمون ونقلب ثم نضع الخل ونفضل نقلب لحد مايغلوا
ثم نضع الطماطم المعصورة وملح وفلفل لحد ماتستوى او تتسبك

طريقة تجهيز الخبز









نضع الزبدة على النار مع الثوم المهروس لحد مايصفر
ثم نضع الخبز المقطع قطع صغيرة مع رشة ملح وفلفل وكمون لحد الخبز
مايحمر ثم نضع علية شوية صلصلة صغيرة وشوية خل ثم نضع شوية
شوربة كوارع ونقلب كله مع بعضه تقليبة
نطلع الكوارع من الحلة اللى كنا سلقناها فيها

تجهيز طبق الفتة
نضع فى السيرفيس الخبز ونفرشه كويس ثم نرصص الكوارع
ثم نضع الارز و نفرده كويس ثم نضع الصلصة على الوش
وبالهنا والشفا




لحمة الراس



لحمة راس - لسان - فشة - ممبار محشى بالارز - مخ - لية
الجبهه - بصلة مبشورة - طحال - ملح وفلفل وكمون
الطريقة
حنطلع الحاجات دى من راس الخروف توديها للجزار هو حيكسرهالك
ويسلخهالك زى مابنعمل فى العيد بالظبط
تقطعى لحمة الراس بالسكينة
ونقطع الكرشة ونقطع الطحال ونقطع الممبار ونقطع اللية
نضع اللية على النار قطع صغيرة لحد ماتسيح ثم نضع شرائح البصل
ثم نضع قطع الكرشة ونقلب ثم نضع قطع الطحال ونقلب ثم نضع
قطع الممبار ونقلب كله مع بعضه كويس ونفضل نقلب تقريبا حوالى عشر
دقايق لحد ماكله يستوى
نضع جرجير فى طبق ونرصص فيه كل اللى فى المقلاية
وبالهنا والشفا




ملحوظة مفيدة من الشيف

1- لو فاضت عندك التتبيلة اللى بنعملها للمشويات (خلطة المشويات) ممكن تشيليها فى الفريزر وتستعمليها مرة تانية للشوى

2- لو تركتى الملوخية تغلى قوى (يعنى لو غليها زاد) لونها حيسود



3- معنى كلمة ان درجة حرارة الفرن متوسطة يعنى 160 درجة



4- بالنسبة لتحمير القطايف



اذا كنتى عيزاها مقرمشة يبقى تحمريها فى زيت غزير
اذا كنتى عيزاها طرية متقدحيش الزيت يكون على البارد شوية ومش غزير
وممكن تخلطى زيت وسمنة مع بعض







الملوخية بالجمبرى



كيس ملوخية - 150ج جمبرى صغير - ذبدة - بصل - ثوم
الطريقة
نضع معلقة الذبدة والبصلة الصغيرة المبشورة تقليبة
نضع معاهم الجمبرى ونشوحهم مع بعض ونضع ملح وفلفل وفصين ثوم مهروسين
ونشوحهم ثم نضع ماء حوالى كوبايتين عليهم ولما الماء يغلى
نضع الملوخية ونقلب تقليبتين ثم نضع التقلية تقليبة ونطفى النار
وبالهنا والشفا
التقلية
نضع فى مقلاية معلقة ذبدة وثوم مهروس وكزبرة ناشفة لحد ما يصفروا
ثم نضعها على الملوخية










البسبوسة




375 ج سميد - 75 ج ذبدة سايحة - 20 ج جوزهند - 150 ج سكر - 125 ج ماء
75 جرام شراب تقيل
شراب خفيف لنسقى بيه البسبوسة
الطريقة
نضع فى طبق غويط السميد وجوزالهند مع بعض
فى طبق تانى نضع الماء والسكر والذبدة والشراب التقيل ونذوبهم مع بعض كويس قوى قوى
ثم نضعهم على الطبق التانى اللى فية السميد
نخلطهم بالمعلقة البلاستيك او الخشب كويس حتكون العجينة مرملة
يعنى مش سوفت او مش ناعمه قوى
ندهن الصينية بالزبدة كويس ثم نضع فيها الخليط ونفرده كويس
ثم ندخله الفرن لمدة نص ساعة على درجة حرارة 175

الشراب التقيل الموجود فى المقادير 2
2 كيلو سكر على كيلو ماء وتعصرى ليمونة بعد ما الماء يغلى
الشراب الخفيف اللى حنسقى بيه البسبوسة
كيلو سكر على كيلو ماء وتعصرى ليمونة بعد ما الماء يغلى
ملحوظة : كلمة عسل هى شراب هى شيرة
طريقة البسبوسة دى فعلا جديدة وغريبة علينا مفيهاش ولا ذبادى ولا حليب وبنضع شيرة بداخلها
انا اول مرة اعرف الطريقة دى
انا عملتها وطلعت جميلة جدا وطعم اللى بتتباع بره بس انا دهنت الصينية بالطحينة بدل الذبدة









صينية قرع العسلى بالبشاميل



واحدة قرع عسلى -500ج سكر - 100ج زبيب - 100ج بندق مجروش
100ج فستق مجروش - 200ج باسترى كريم - 100ج كريم شانتى
جيلى ساخن للتلميع
نقشر القرع ونقطعه مربعات ونشيل البزر
نضع القرع فى حلة على النار مع السكر بدون ماء خالص
(هو حينزل مايته ) لحد مايستوى القرع نصفية بالمصفاة لحد ما كل الماء الموجود
فيه ينزل كلهمن غير مانضغط عليه نضعه فى الصينية ونضع علية الزبيب والبندق والفستق
ونضغط على المكسرات بظهر المعلقة علشان يمسك فى القرع
نضع الباسترى كريم فى طبق غويط ونحركه كويس بالمضرب السلك علشان ينعم شوية
ونضيفله سنة حليب اثناء الضرب ثم نضع علية الكريم شانتى ونخلطهم ببعض تانى كويس
نضع الخليط دة واسمه (بشاميل حلو) على وش صينية القرع العسلى ونرش رشة سكر بودرة
ةندخله الفرن تحت الشعلة علشان ياخد لون بس من فوق
وبعد ما يطلع من الفرن نلمعه بالجيلى الساخن بالفرشاه
وبالهناوالشفا






البشاميل الحلو للحلويات
200ج باسترى كريم - 100ج كريم شانتى
الطريقة
نضع الباسترى كريم فى طبق غويط ونحركه كويس بالمضرب السلك علشان ينعم شوية
ونضيفله سنة حليب اثناء الضرب ثم نضع علية الكريم شانتى ونخلطهم ببعض تانى كويس
ونضعه على وش الصينية




الكريم باتسير

دى طريقة عمل الكريم باتسير فى البيت
كيلو حليب - 200ج سكر - 80ج كستر بودر - 4 صفار بيض - 2 ونص ج فانيليا
الطريقة
نضع فى طبق يلاستيك السكر وصفار البيض والفانيليا والكاستر بودر
ونضربهم بالمضرب السلك كويس قوى قوى
نضع الحليب على النار لحد مايغلى ثم نضع علية الخليط ونخلط بالمضرب السلك كويس
يادوب غلوة على النار ثم نضعها فى طبق ونغطيها بسرعة
بكيس بلاستيك ونقفل على وش الطبق كويس قوى علشان
متعملش قشرة (الطبقة الجامدة اللى بتتكون دايما على الوش)






الكشك بالجمبرى

150 ج جمبرى - ارز مسلوق - زبدة - دقيق - بصل
الطريقة
نضع معلقة ذبدة والبصلة الصغيرة المبشورة تقليبة
نضع معاهم الجمبرى ونشوحهم مع بعض ونضع ملح وفلفل وفصين ثوم مهروسين
ونشوحهم
نضع2 معلقة كبيرة زبدة فى حلة ثم نضع معاهم الدقيق ونقلبهم ثم نضع الحليب ونقلب نقلب
ثم نضع شوية ارز مسلوق ونقلب نقلب ثم نضع الجمبرى ونص كمية تقلية البصل
اذل لقتية خفيف زودى ارز مسلوق هو كله ممكن ياخد من نص لكوب
ارز مسلوق نغرفة فى طبق التقديم ونضع باقة تقلية البصل على الوش
تقلية البصل
نضع معلقة زيت فى مقلاية ونشوح فيها بصلة كبيرة لحد ماتصفر
وتبقى لونها بنى فاتح
وبالهنا والشفا




سلطة الطحينة



200ج طحينة - ثوم مهروس - ربع كوب خل - ليمون - معلقة صغيرة كمون
ملح زيت زيتون
الطريقة
ندعك الطحينة قوى بالمعلقة ونزود شوية فى شوية ماء لحد ماتسيل
نتبلها بالتتبيلة والثوم والخل والليمون ونضعها فى سرفيس التقديم
ونزقها بقطع الفلفل الملونة على هيئة وردة




قطايف بالجبنة واللحمة المفرومة



نص كيلو قطايف - جبنة بيضاء ملح خفيف - جمبرى سوتية - لحمة معصجة
بقدونس - نعناع - بيض مسلوق - زيت
الطريقة
نضع معلقة ذبدة والبصلة الصغيرة المبشورة تقليبة
نضع معاهم الجمبرى ونشوحهم مع بعض ونضع ملح وفلفل وفصين ثوم مهروسين
ونشوحهم
نهرس الجبنة ونضع عليها سنة نعناع وبقدونس مفروم ونحشى القطايف
نحشى شوية من القطايف بالجمبرى المتشوح
نقطع البيض المسلوق قطع ونضعه على اللحمة المعصجة ونحشى القطايف
نحمرها فى الزيت وبالهنا والشفا




كيكة الجزر



8 بيضات - 375ج سكر - 250ج جزرمبشور - 175ج مكسرات - 40ج دقيق
10ج قرفة - 50ج زيت - 1/4 كيلو فندان
الطريقة
نضع البيض والسكر فى الخلاط لحد ما السكر يدوب تماما
ثم نضع الجزر والعين الجمل والقرفة والدقيق مع بعض واخلطهم كويس
ثم اضع عليهم خليط البيض والسكر واخلطهم
ثم اضع الزيت واخلطهم واضعها فى الصينية وادخلها الفرن
بعد ماتطلع من الفرن نقطع بالسكينة الجوانب الناشفة ونضربها فى الكبة
نسيح الفندان على حمام مائى او نسخنه وبعدين نصبه بسرعه
على كيكة الجزر ونفردة بالسكينة العريضة (الباليت)
ثم نزوقة ونضع عليه وحدات جزر مسكر وعين جمل ونضع على الجوانب الكيك
اللى احنا ضربناه فى الكبة
وبالهنا والشفا






ملاحظات مفيدة من الشيف


لازم نهرس البطاطس المسلوقة وهى ساخنة جدا علشان متعملش عرق يعنى متعجنش


الحاجة اللى بتلخبط معظمنا ودايما نسئل عليها لية الكفتة بتفك مننا واحنا بنشويها ؟؟؟


لما تشوى اللحمة او الفراخ تضعى فى التتبيله ماء البصل
يعنى البصل نفسه بعد ماتبشرية تضغطى علية كويس بين ايديكى كأنك بتعصرية
وتستعملى الماء بدون البصل


لكن لما تشوى كفتة تضعى فيها تفل البصل
يعنى البصل نفسه بعد ماتبشرية تضغطى علية كويس بين ايديكى كأنك بتعصرية
وتستعملى البصل نفسه بدون الماء اللى نزل منه









بطاطس بيورية



كيلو بطاطس مسلوق ومهروسة - نص كيلو حليب - 100ج زبدة - ملح - فلفل
نسلق البطاطس لحد ماتتهرى وبعدين نهرسها كويس ثم نضع الملح والفلفل
ونقلبهم ثم نضع الحليب واقلب ثم اوضبها فى السيرفيس واسويها كويس
وبالهنا والشفا
ملحوظة : كل مانديها حليب كل ماتدينا طعم احلى







الفراخ المقرمشة

فراخ مسلوقة مقطعه ارباع - ملح - فلفل - 1/4 كيلو دقيق - 1/4 كيلو نشا
فنجان حليب - فنجان ماء - جنزبيل بودر - كمون - شطة
الطريقة
اسلق الدجاج فلى ماء فية بصل وملح وفلفل وبهارات دجاج وحبهان وورق لاورو
بعد ماتبرد
نضع الدقيق على النشا على الملح والفلفل والبهار والجنزبيل والشطة ونخلطهم بالمعلقة
وبعدين ننزل بالحليب والماء عليهم لحد ما حتتكون عندك عجينة سائلة مثل البشاميل
ثم نضع فية قطع الفراخ المسلوقة ونصفى الزيادة من العجينة دى
(يعنى تمسكى قطعه الفراخ لفوق وتسبيها تنقط الزيادات )
رصصيها فى طبق ودخليها الثلاجة من ساعه لساعتين وبعدين اقليها
فى زيت غزير لمدة 5 دقائق وبعدين غطيها بغطاء وهى بتتحمر لحد ماتحمر
وبالهنا والشفا




ملحوظة : الوصفة بدون صور لان البوتجاز خرب عندهم اثناء عرض الحلقة






كلاب ساندوتش




توست - 100ج جبنة رومى - 100ج صدور دجاج مسلوقة - 100ج روزبيف - 2 معلقة مايونيز
ورق خس - شرائح طماطم - كاتشب - مايونيز - مستردة
الطريقة
نضع التوست فى الفرن ليتحمر تحمير بسيط قوى
نخرط الخس صغير قوى ونضع علية مايونيز ونخلطهم كويس بالمعلقة
نقطع صدور الدجاج شرائح رفيعة
نضع التوست امامنا بجانب بعض ونضع على كل توستاية معلقة خس بالمايونيز
ثم نضع على كل توستاية شريحة روزبيف ثم نضع شريحة دجاج ثم نضع
شريحة جبنة ثم نضع شريحة طماطم ثم نضع واحدة توست
ثم نقطع الحروف بالسكينة








بتى بان بالسوسيس



خبز بتى بان - سوسيس
الطريقة
نسلق السوسيس فى الماء ونحمرة فى الزيت
نفتح الخبز البتى بان واضع واحدة سوسيس ونضع عليها
مستردة وكتشاب
وبالهنا والشفا







رموش الهانم (سندوتش جبنة)



خبز فرنساوى (فرنش بريد) - جبنة - طمطماية - زيتون
الطريقة
نحشى الرغيف كله على بعضه وبعدين نلفة فى ورقة فويل
وندخله الفرن شوية وبعد مايطلع نقطعه بالسكينة وهو ملفوف بالفويل
زى ماهو وبعدين نفط الورق ونرصصه فى طبق التقديم







سندوتشOpen-Face

خبز فرنسى(فرنش بريد) - تونة - لانشون - روزبيف -زيتون - طماطم- بصل
جبنة
الطريقة
نقطع الخبز بالورب ونرصصه فى سيرفيس
نضع البصل والطماطم والتونة ونخلطهم مع بعض
ونضع على الخبز الخس بالمايونيز ثم نضع ورقة خس
ثم معلقة من خليط التونة
وعلى خبز تانى نضع الخس بالمايونيز وعليه شريحة لانشون وزيتون اسود




ورق عنب محشى بالمكرونة




نص كيلو ورق عنب - مكرونة اسباجتى مسلوقة - جزر - بسلة
لحمة مفرومة معصجة - طمطاطم بيورية
الطريقة
نسلق الورق عنب
نضع الجزر المقطع والبسلة والعصاج على المكرونة ونقلبهم
نضع امامنا 3 ورقات ورق عنب بجانب بعض على هيئة دايرة
نضع فى المنتصف شوية مكرونة ونقفل الورق العنب كويس على المكرونة
ونلفها بدوبارة كويس
نضعه فى صينية بجانب بعض ونضع على الوش طماطم بيورية ونرش
رشة جبنة موزاريلا وندخله الفرن لحد ما الجبنة تسيح
وبالهنا والشفا




دبابيس فراخ بانية

كيلو دبابيس - دقيق - بيض - بقسماط - حليب - سمسم
الطريقة
نضع السمسم على البقسماط ونخلطهم
نعمل شق فى الدبوس بالسكينة لحد ما اللحم يسيب العظمة بتاعه الدبوس
وبعدين تروحى مرجعه اللحم عكس اتجاه العظم وهكذا
نتبلها بماء البصل وملح فقط ونخلطهم كويس ثم نضع الدبوس فى الدقيق
ثم فى البيض ثم فى البقسماط وبعدين نقليها فى الذيت
وبالهنا والشفا





الارز بخلطة



نص كيلو ارز - 200ج كبدة فراخ - 2 معلقة طماطم بيورية - 100ج ذبدة او زيت زرة
ذبيب - 150ج لوز - بصلة - ملح - نص لتر ماء
الطريقة
نضع الذبدة فى حلة على النار وعليها الارز ونقلب نقلب ونضع ملح وقرفة
ونقلب نقلب ثم نضع الماء ونغطية ونكمله عادى لحد مايستوى
ل